Pasian’ Nasemte (Pastors) leh Human Rights


Khangthak hun tawh kituak in Pasian’ mizat mahmah Franklin Graham te pawl omlo hi leh Pasian’ thu umte leh Pasian’ nasemte’ kam a humcip nuam liberal pawlkhat om khinzo hi.

.
Pasian’ Nasemte (Pastors) leh Human Rights
============================
 
Khangthak hun tawh kituak in Pasian’ mizat mahmah Franklin Graham te pawl omlo hi leh Pasian’ thu umte leh Pasian’ nasemte’ kam a humcip nuam liberal pawlkhat om khinzo hi.
 
Upnapeeng (Liberalism) huzaapna tawh Lai Siangtho tawh ki lehbulh thu tampite lakah; neih kibang kitenna (same-sex marriage), naungek thahna (abortion) te ah Pasian nasemte a kamhum cip sak nuamin; politics leh Pasian nasemte kisailo hi cih khakcipna bawl nuam uh hi.
 
Gamvai Pasian nasemte tawh kisailo hi cih paulap in mipi in Lai Siangtho gen thuman a mugloh nading leh; Pasian’ deihbang in thu gen theih loh nadingin khim bawl uh ahi hi. Tua pen kumpi lui Obama te’ khutsung ah suuk mahmah in; Tapidaw te’ upna bawlsiana leh nengcipna pen amau hanciamna ahi hi.
 
Lai Siangtho hilhna a khaktan nuam leh a nawngkai sak nuam in Satan in na tampi sem khinzo hi.
Moses hong suah ding ciang in, pasal no naungek khempeuh thahna tawh Pharaoh #kumpi in thupiakna nei hi (Exodus 1:15-22).
 
Naungek Zeisu hong suah ciangin akiim a om naungek teng thah nading Herod #Kumpi lam mah pan thu hong om hi (Matthew 2:16).
 
Pasian thu ahih nak a leh defend, support protect uh uh hi. Tua pen Tapidaw khempeuh’ mawhpuak ahi hi.
 
Pasian thu pen mun khempeuh, mi khempeuh tungah (Mark 16:15) hun khempeuh (2 Timothy 4:2) ah pulak ding ahi hi.
 
Pasian’ kamciam naungekte a kithah sawmna pan Pasian’ mite in kem in, sel in panpih uh hi.
Pasian’ thu tawh kituaklo, Pasian langpanna thute ah hilhna, genkhiatna leh tangdin zawhna neih ding pen thu-um mite’ mawhpuak ahi hi.
Tuhunah mi khempeuh in ama lungsim muhna, sandan leh puakzia gen theihna aneihna uh puak nading online platform hoih tektek hi.
Obama leh a pawl Liberal te in Pastor te’ sermon natawm khaktan sawm mah taleh; Pasian in phal nailo ahih manin Trump hongkah to sak hi.
 
Mimal khempeuh in freedom of speech (suakta tak a gen theihna) paulap pi in a nei Democrat te in, Pastor te/ Pasian nasemte in amau muhna a gen pen sanzawhlohna aneih uh pen; human rights principles a palsat uh ahih lam amau leh amau ki theilo citciat uh hi.
 
Mizawng, peemta leh nuntakna khempeuh manphatna paulap in thugen ahi liberal ngaihsutna aneite in, ahun ding a omlo anu’ gil sunga om naungek thahna (abortion/ killing of babies) pen thapia citciat uh ahihna pen; amau lep thubullet tawh ki lehbulh zeel hi.
 
Pasian nasem ahi a; company nasem ahi a; mipi’ nasem hita leh mikhempeuh (numei, naupang) in thu tuamtuamte ah ama muhna leh ngaihsutna a pulak theihna pen (freedom of speech) ahi hi.
Mi khempeuh in ama muhna pulak thei ding in; Pasian nasemte in amau muhna pulak theilo zawsop ding cih bang ngaihsut khialhna pen; Human rights principle tawh kituaklo banah; constitution tawh zong ki tuaklo hi.
 
Obama akiteel ding hun lai in Pasian nasemte, Tapidaw te in “Pasian vai leh politics kisai khalo hi” cih tawh mee (vote) khialo kha uh ahih manin, Pasian langpang Obama leh a pawlte in mun hong ngah manin, biakna hencipna leh gakcipna tampi hong nei man uh hi.
 
Upna thu a a peeng sak nuam, a phunciak nuam leh upna thu a lehdo nuamte hilh ding, lamlah ding pen Tapidaw khempeuh i mawhpuak ahi gige den hi (1 Peter 3:15).
 
Pasian a it takpi a; Pasian gam ading a vei; Khangthakte’ mailam a khualte in Pasian’ langpang kipawlna, party leh mimal, makaite peel in; Pasian thu tawh a kituaklo thute gen ngam, pulak ngam in Pasian’ upna thu lencip in dinpih tinten ding pen Lai Siangtho hilhna ahi hi (Matthew 24:13).
 
Lai Siangtho in mun khempeuh, hun khempeuh ah thungen ding ci hi mah leh, leberal (Democrats) kumpi in sanginn, zumte leh kumpi zum ah thu nget ding phallo hi. Hihbang Lai Siangtho lehpanna leh Pasian’ lehdona pen thu hangsan takin a gen ding pen Siate, Pasian’ nasemte mah ahi hi.
Lai Siangtho sungah Pasian zia tawh a kalsuanlo kumpite’ tungah hangsan takin a thu gending pen Siampi leh Kamsang te bek mah ahi zaw hi.
 
Pasian’ kammal Lai Siangtho pen paulap a zat ding hilo a; bulphuh a neih ding ahi zaw hi.
Thuman, thutak leh Pasian ading a dingkip zo den dingin thu-um mite TOPA in hong makaih den hi.
 
Disciple @Sianpu
Tulsa, OK
February 8, 2020
65 Views

Comments