Zomi te in Lampi en kawm kawm mah in paipai hun mahmah khin lua zo ta

Dear Zomi sung ah Innkuan pih a kuamah peuh,

Zomi sung ah i kisap tampi a omna lak ah akisam phadiak (tu mahmah in zong a kisam pah lian) thu khat in I “Zomi te in Lampi en kawm kawm mah in paipai hun mahmah khin lua zo ta” hi cih ahi hi.
Ei I pai kei zong hun leh nite paipai hi. En I sem kei zong I hunte hong bei toto hi. Pawl khat-te bang in a gen bek pen cimtak lua mahmah ta uh ahih man in bang mah gen nawnlo liang, geel kholna nei nawnlo liang, kikupna khopna om man nawnlo in sem pah thei lai hi.
I. Gen gen leh kikup kup bek tawh hun bei in bang mah kisem khia taktka theilo
Tu laitka a I kisap thu in lampi, I lampi, I mailam ding en kawm mah in paipai hunta hi icih mah bang in khat veivei caing in I Zomi kipawlna te ah Geel bekbek kisi in, sep ding mahmah ciang ki tunzolo thei hi. Geelgeel, gengen, kikupkup bek tawh hun bei in sep leh bawl ding tampi zekai in, mi dang khat peuh in eima sepnop, eima idea khat peuh na lai sep sak ziau thei hi. Thu leh la tawh kallsuan lua nuam ihih man in geelgeel lua liang zaw in, sep hun ding om sak man nawnlo hi hangh. Gtn thu leh la kaht peuhpeuh ah I vek in I ki thukim khit mateng cih dan in a na khempeuh a (standard) dan in la ihih man in kithukim khit ding lah hi thei ngeilo phial ahih man in bang mah sep loh tawh hong kizom toto lel thei hi.
II. Gengen ding hun hi nawn kei, sep ding hun hi ta ci-in geelna omlo in sep khia leuleu
A lang khat leuleu pan in gengen kul kei, sep pah ziauziau ding hi, gen ding hun hilo a sep ding hun hi ta hi ci-in tua bek bulphuh lua leuleu kha ihih man in geelna kician, principle leh policy kician om nailopi in sep kisawm pah a sawt kikhom lo thei leuleu bek thamlo in a dang teng “thu tangpek, thu tuam pai…” zong hong cih san thei leuleu hi.
Gengen thapai in bang mah sepkhiatna a om kei leh a mawkna hi, veina tatak omlo hi ci-in ki mawhsak thei a, tua mah bang in geel kholhna omlo leh a thu leh la min masa phot lo in veina masuan in sep pah bungbungna in saupi kikhomlo bek thamlo in koimah hong tunpih taktak zo khollo hi cih zong a om leuleu hi.
Leitungbup a om Zomi kipawlna tuamtuamte en leng a tamzaw ah Veina bulphuh makaihna, Veina masuan sepkhiatna cih ki thupi sak in zong tua mah ki paulappi in kinei hi. Veina omlo tawh bangmah ki sem theilo a, veina masuanlo tawh bang mah ki tangtungsuak taktak lo hi.
Ahih hang in Veina bek a masuan kipawlna khat ah akisam tampi a omna lakpak akisam pha diak in policy leh principle kician neih masak ding cih ahi hi. Tua ahih kei leh tua kipawlna pen kip zo taktak lo a, zung thukzo taklo ahih man in a picing ding zah in picing zo lo kha ding hi. Tua mah bang in policy leh principle bek bul letpi in nei in, sepkhiatna lam ah I masuan kei leh gelgel leh kikupkup bek mah tawh hun bei toto thei hi.
Change will not come if we wait for some other person or some other time.
We are the ones we've been waiting for. We are the change that we seek.
(Barack Obama)
Zomi-te a tamzaw pen eima theihsa, eima zatsa, I sansa upna cih a kipan (dogma, old way mah bulphuh in a omsate tungtawn) bulphuh a kikalsuan minamte ihi hi. A hoih khat I theih natawm ki sem ngamlo paklo hi. Tuabang lungsim I neihna pen a beisa a i lungsim hong gakcip thu leh la khat, I gamtatzia leh I vaipuakzia a kipan vai khat peuhpeuh I ‘influence’ zong hi kha ding hi. I theihloh a I seploh khak thu hoih pen eima khialhna hilo a, hoih hi ci thei napi I sap khakloh pen eima khialhna leh eimah mah hong ki mawhsak kha ding hi.
Zomi sung ah zong tuma kum 50-90 lai kikal hun pawl in Zomi numei sung ah laisin ding, sangkah ding te ki maizum pih in, kiko sia hi. Numei pipi sang kah ci a kipan in mipi leh kim leh pamte’ gensiatna na ngah uh hi. Tuate kantanzo in lai a leh pilna a sin teitei Zomi sung ah numei makai bang zah hiam khat ki om khin ta hi. Tua hun lai in midangte’ kosiatna leh maizum thuak ngamlo uh hi leh Zomi te I nuntakzia, a diakdiak in Zominumeite a ding in lametna tawm mahmah ding hi. Khangthak pau leh “risk takers” kici hi.
Lai gelh siam khat in “if inventors feared criticism we would still be travelling by ox and wear homespun clothing” naci hi. Thu hoih khat, na hoih khat a ding I theih ahih leh mite’ hong gensiat ding lauluatna tawh I sep theih ding tampi seploh a suak zong tampi om thei hi. Hih pen Zomi te nuntakna sung ah biakna, pilna, kipawlna tuamtuam leh I nisim nuntakna sung ah I tuah khak thute ahi hi.
Tua bang in I sepna sung ah Veimasakna omlo in bang mah a kisep theih loh ban ah, Veina bek masuan tawh koimah ki tungzo tuanlo ding hi. Tua ahih man in I veinate (zeal and enthusiasm) khan in hoih tak in geelna tawh zom in, I geelnate khan to in sepkhiatna tawh I lah khiat theih na ding Zomi leh Zogam in hong ngaklah mahmah ta hi!
Gam leh nam veina mah tawh na seppih uh,

Taang Sianpu
sianpu@zogam.org
January 24, 2010

Views: 40

Comment

You need to be a member of Zomi Community Network - Your Network to add comments!

Join Zomi Community Network - Your Network

Comment by Naulak Dim on February 14, 2010 at 11:19am
Hi lua ki sa ei. Lai at U Sianpu zong siam in a deih na zong thupi mah mah ei.
Ih vek in ong ki tag ci leng ih han ciam tek kul lo dia ma te.

© 2018   Created by Zomi Community Network.   Powered by

Badges  |  Report an Issue  |  Terms of Service