Ki thutuak loh man cih sang in, makaite' pilvang loh man ci leng zong kikhial lo ding hi. Mipi zong lah pilvang lah veve cih ding hi in teh ci ingh. Chin bup ai tang ding khawl kik ahi hi. Chin bup cihna sung ah acihna sung ah UNHCR i policy vai ah a ciapehna ah Zomi te zong akihel khin sa ahi hi. Tutung a pen a thu hoihlo cih sang in, a dan siamloh man zong hi zaw deuh hi.

 

I vot leh vot khawm ding thupi a, i lum leh lum khit ciat ding thupi hi.

Fact Finding Pawl khat ensuk ni.

 

1. UNNHCR i nasepna khempeuh pen 100% FREE hi. US i tun dong mah free suak hi. IOM pan vanlengsaap hong leitawi simloh. Ahi zong in Service fee pen free hih hang in sum beina bel om veve cih theih ding kisam hi. Gentehna UN zum a pai ding hi le teh na lam saap sum bei hi. Na sun annek man sum bei hi. UN zum phone nading in na phone card lei man sum bei hi. Communication & Transport fee bel om hi. Service fee omlo cih bek hi.

 

2. UNHCR in tutung a min lakna pen UN ngahna, UN Register HILO hi cih a tung pek pan in kician tak in gen khin zo hi. Mobile Register zong hilo hi. Tua hang in zong innkuan lutpih ding DS te hel kei un cih a gen sinsen ahi hi. UN Register hilo cih thei ahih man in CRC leh ZIM te in sum pekkhat zong lalo uh hi. UN ngah ding hilo, UN ngahna hilo cih thei gegeu a pia te in zong pia nuam, pia ngam a, a ngente in zong ngen ngam, ngem nuam uh hi. Tua pen UN register ding ahih loh lam a theilo maw, a thei gige a sep maw cih dotna a nei pawl khat om hi.

 

3. Lam khat leuleu pan in Kipawna/ Community khat in a mimalte a kizopna ding in sum bei ahi hi. Kipawlna pen volunteer based organization hi a, business or money-making organization hilo hi. Tu ahih man in newsletter ah a suahsak nading uh, phone hih min sazian (name list) vai a van nading uh phone man pen sum tampi mah bei ding hi. Newsletter man sum bei a, kihopihna tam veipi vai kikhel a om leh van kul ahih man in admin cost, transport leh communication pen sum ei mah hi. Tua ahih man in tuate kua pia ding a, koi pan ngah thei ding hiam? Member te tung pan hong dong kei leh, member lo te tung pan lah dong theilo ding ahih man un, hong dong mah uh a kul ahi hi.

 

4. Mimal khat 100 pen a tamlua ahi loh hang in innkuan khat sung ah mimal 4 leh 5 a phak ciang a sum piak beh leh a card bawlmante tawh gawm tam hong tung to mahmah a, piak ding a nei zolo takpi zong tam acih in tam hi. UN ngah nailo teng pen a tamzaw ah mithak hi a, mithak a tamzaw in nasep kician nei nailo in, sum leh paai tawh hong ki pai hilo ahih man in haksa sa zaw tek uh hi. A sum piak ding neilo, UN ngah takpi ding lah sa in a cimawh khitui naptui tawh, nasep tan lawh lailai Zomi tampi mah zong lah naom veve hi (hih sum nget leh min lak vai ah).

 

5.UNHCR i service khem peuh free ahi hi cih pen mikim in theihsa hi. Ahi zong in community te nsepna pen free hi kici tuanlo hi. Kuamah in 100% free hi ci tuanlo uh hi. Tua ahi man in mikhem zong lah cih theih khin tuanlo veve hi.

 

6. Tutung a pen community tungtawn pan hilo zaw a, UNHCR ngait in min lakna a nei ding uh ahih man un tua nasepna a ding in sum la cih pen UNHCR i policy tawh ki lehbulh hi leuleu hi. Nidang lai mobile lai ahih leh community initiative hi a, tutung a pen Office initiative ahih man in nidang tawh teh theih ding bel hilo hi.

 

7. Tutung a hong khawl kik, hong cancel kik hang in Malaysia gam hong kan, gamgi ah a awk lai, puaisate' khutsung pan hong taikhia zo nailo, KL hong tung dekdektate a ding in hun hong lap kik suak bilbel hi.

 

8. A tawpna ah $um ngen kipawlnate in zong tang nget, hah nget, pum nget, piakloh phamawh dan in Kawl kumpi in arrna a sum dong dan hi sam kei hanla, mipite in zong tua ci nget tangtang a kul ma in a kisam sum bei dingte panpihna, mapan khopna in a pia hi leh tu a i tuah buaina omlo ding hi!

 

Tua ahih man in hih tungtawng in i lak theih pilna in ahih leh:Kipawlna leh Mipi in na sawm khawmlo, ma pangkhawm lo hi cih kitheihd ing thupi a, mailam ah Kipawlna or Kipawlna makaite in mipi zawh ding thupi, mipi tawh pan kho ding thupi a, mipi in zong kipawlna te hehpih bawl in, ma pan khop pih ding, vangik puakpih ciat ding kisam hi. A pualam a nasemte sang in kipawlna ah a semte in sum kisam zaw uh a (sum thalawhlo uh ahih man un), amau sum ngah theih nadingte haza selo in, panpih zawk ding akisapna thu imu khia hi.

 

Kipawlna te in zong mipi metbawl ding leh sum ngah nading bek bulphuh lozaw in, mipi in zong eima met nading bek enlo in, kitelsiamna nei tuak leng (common understanding) vai buai nading om lo hi.

 

Malaysia, Thai leh India a om Zomi Refugee te' mailam, kalsuanzia, tulaidak thupiangte leh vai khat peuhpeuh kikupnopna a neinuamte in thu hong sung toto un. Zomi Facebook Group tungtawn in kikum toto ding hi hangh!

Views: 226

Replies to This Discussion

aw lungdam huai ei, hih bang a lungduai tak leh i cian tak a nong gelh uh

RSS

© 2017   Created by Zomi Social Network.   Powered by

Badges  |  Report an Issue  |  Terms of Service