CING
1. Cing Khup in, tuikicing salo ahihman in tui luanglai cing' a, tua sungah ciingduai tampi adiah hi.Tua lai tak bawngcingnaupangten vamu uh a,CingKhup omdan ava ciinguh hi. Cing Khup in kei hongcing kei un la, Hat na kisakuh leh lo ciingnihnciingthum bangkho-in, Khaici tuamtuam cingzaw un; Kei lah ta nih neisam ka hihman in mi ciing hi zenzen lo hing"  cihi. Ahih leh nata acingh uh hiam cih adot uh leh " Ka ta tebel kaplo ahih teh acingh mah hi. Kapasal zong micinghmahmah khat ahih teh, ci hi.
DONG
2. Gin Khan Dongh leh Dongh Ngaih Ciin pawlpi sumdong ding in,Tedim pan Vongmual dong a naungek dawng thin then khat apuak kawm in apai uhhi. Vongmual koilam hiam cin in mite adong kawikawi uhhi. Kua mah adawng thei a om kei hi. Donghtuak kisa mahmah uh hi.
HAIIHAII
3.A haina theizolo mihaikhat, an haimahmah a, haii zan se lo in an anehaihai hi.Zu zong hai ahih man in haisawm ciangciang dawn khat suah lel a, hai kung nuai kawngah naangtawh kiphaan  Haaipi khatsungah tu-in,apuan kawtte meiah ahai khawm in zuhai pi khat adawn hi.
KAANG
4.Va kaang sa, sathau tawh kang in la, atui kangsak in .Ahih hang kaangsak tuan ken,Amin ciang Sabel pen  Kaangtak in koih khian in.
KHAMH
5.Khamh leh Ngun pen van kham ahih hang in, Khamh theih Guih theih tebanglo a, a kham te na gawn in zong iplah uh hi. Pau Khan Kham in zukham lua ahihman in, akhe khuan taw lam ah ki kham phei a,"Hong domzo aom leh Dangkaa 100 pia ning ci-in a kham hi.
LAM
6.Pum Za Lam in apute in lam ding in, lam nuai lam tawn a, laam thum bang asau ciangtawn pua kawm sa in alaam LamMung amuh ciang akhut lam to a, neih leh lamh bangmah ka neih loh hangin, hih mun pen ka lamh kiatna ahihman in ci-in alaam pih hi. Inn lam dinga, apailam kimangilh lianghi.
LEI
7.Lei tungah gunleei, lei nuam mi Heilei te bek om hi ci-in leii na liang in akiko mi khat aom hi.
LING
8.Lingmin baak ding a, linglak ka pai leh akno ling thilthel, khuadamsa a,  liing keuhkeuh kawm a, pai liingliing khat ka mu hi.
LIM
9.Anlim mahmah na nek khit limh in,limbu hat leh khau liim khat tawh  muiliim pa inn ah liim langh ah va kien in. Tua khit ciang in singlim ah limtak in tu khian in.
MAAN
10.Vung Ngaih Maan  leh Dim Sian Maan in, buh man tawh ahuan ding un,a ak man uh a, amanh dingzah theilo ahih manun, thu maan gen dinga, aupmawh mikhat kiang ah, Hih ka ak man zah ding nong nong gen man diam?acih uh leh  " Ka mang in note geel maan  inn sung ah om bang in hong manh ing aci mawk hi.
PAII
11.Nau paii nu mei khat Pasian paaiding a,tem paai khat kuah sa in apai leh  laam nal in kipaai aa, atempaai apaai khia hi.
SAANG
12.Pilnasaang sin dingin saang innah  apaite'n asangam te ton pih theiloding uh a, veih sang om theilodinghi acih uh leh, ansangh kaikhawm numei khat in," Hih bang thu kisaang keileh hoih saang acihi.
SUUM
13.Thang Lian Suum in ni asuum ciang in  asum teng sum pahpah hi. Tua ahih man in Khau sumh teng peh in, asum tawng a, Sum tung ah atu hi.
SUNGH
14.Ka sungh pan bel sung ah tui asung suk hi.
TANG
15.Antang pua dinga, lam tang mahmah khat ka tot leh nahtang liim ah taangteuh khat in tangteel nih nane hi. Tu a kipan satang ta ning ka cih leh, leisek tangh sanggih pua a,  tangh natna avei mi, Tangpi u' zawl te khat ka mittang tawh Tuitang zangah ka mu hi.Tua lai tak in akamciam tangtung sak lote tangpitangta in nitaang musak loding in, kawhawm sung ah tangciak sak uh hen, lia leh taang te aw,ci-in ataangko mipa in kham tang nik sungah taang tawh kibang tangho phel tun a, keizong tanggam lo zawzen in, ka etet leh ataanggai(gongkholh) neilo akpi khat in tua mipa maitang na phuaisak hi.Taanglai hun hi leh taangthu suak pah mah ding hi ven ,kacibek hi.
 
TAWM/TOM
16.Khatveisia Tompu singtom ding a, apaileh ui tawm khat mu a, tawm pah hi. Sing tawmno khat tawh aciah leh ainn vua apa na kitom vua vua a, akineih tawm hi'n teh ci'n  atawm phei ciau hi.
Hih atunga, te in ih kammal lai mal kibang khat in khiatna cih nopna tuamtuam leh zatna tampitak nei hi,cih honglak hi a, ih pau leh ih lai hoih zia hongkilangsak pha san hi.

 ZOLAI.....PAUNAM KHEN NA LEH PAUNAM LUAN LUAN LAIBU, Dr Cin Sian Pau bawlna laimai 105 pan 107 sung a om thu hi.

Views: 61

Reply to This

© 2018   Created by Zomi Social Network.   Powered by

Badges  |  Report an Issue  |  Terms of Service