Global Zomi Alliance (GZA) News & Views

Views: 296

Reply to This

Replies to This Discussion

GZA leh Zomi bup Mailam


Global Zomi Alliance tawh kisai muhna leh ngaihsutnate kikum khawm ni.

1. "Leitungbup Zomi Makaite" cih thulu nong thuah giap uh pen a ngaihsut huai mahmah thu khat ahihi.

-"Leitungbup Zomi Makaite mah hi takpi hiam? Kua pi a, kua ci hiam etc..." cih huai tawh kibang hi.

-Leittung pian zawh Zomi sung ah Leitungbup Zomi Makai cih min a ki vawhngam kuamah a om naikei a, tu a GZA hong pian ciang in a masa pen ahi pah hi. Midang khat peuh, kipawlna khat peuh a vawh ding hi leng zong kilawm i sak ding tuciang ciang a om nailosuak hi. Ahi zong in GZA in Leitungbup Zomi Makaite hihna dinmun hong lak ngam a, Zomi te hong makaih nop pen mihing i khuak ciang bek tawh hong piang hilo a, Pasian' hong khaisi tuhsak a kidawkta hi ding hi. Makaite in zong amau leh amau zong confidence nei uh hi. Leitungbup ah makaihna (leadership) khat peuh ah confidence a neilote in mipi makaih zo taktak lo hi. Confidence neilo makai tampi mah ki om hi. Neilo icih ciang in zong neih theih nading capability & ability nei nailo zong hi zaw mai uh hi. Ahi zong in tu a GZA Makaite in Leitungbup Zomi Makai hong kicih giap ngam uh pen, hangsan kasa a, Zomi-te mailam ding thumu kasa hi. Khasum tawh kicial zong hi beek lo a, a Veina, Pasian' piak thumuhna, a Pilna leh a Siamnate uh hong mipi' a ding in zang takpitna ding in kimin vawhna zong ahih man in lungkim huai in, angtan huai mahmah hi.

2. Leitungbup Zomi Makai hi thei takpi ding hiam?

-Zomi makaite in khua khat, party khat, biakna nam khat, pawlpi khat, gam khat ciang bek a ding a sem hilo a, tua mun ah zong a om hilo hi. Leitung bup huam takpi a Asia, Europe, America gam huamte pan in ki kaikhawm ahih man un leitungbup huam takpi ahi hi. Gam khat, khua khat, pawlpi khat, biakna khat makai uh hi ici nuam zong in a hi theilo thu ahi a, leitungbup huam gam khempeuh leh Zogam pan bulpat in hong longkhia ding Zomi leh Zogam khanlawh nading movement akipan toto suak ahih man in angtan huai mahmah hi.

3. Pasian nasem maw, Zomi makai?

-Leitungbup ah gam khanto pen leh a picing pen gam in America gam mah ahi hi. Hawmthawhna tampi a om kha ding zongin USA a ban zo ding gam om nailo a, zong om ngei pak lo ding hi. Mangpau kizang in, leitungbup in amau kampau zatpih a, a gam uh ah beel in, inntualzang ding in ki deihtek hi. A diakdiak in gamkhat a ding in Lai Siangtho a bulphuh, Pasian' thu mah a thupi sak leh, sum leh paai laidal tung natawm ah Pasian' hihna a pulak gam ahih manin tudong mah tavai ngeilo in leitungup i makaipi suak to suak hi.

-Zomi leh Zogam a khantoh takpi nading in Moses te, David te bang in Pasian' sathau nilhna kisam hi. Leitungpilna tawh bang zahtak in aki muang a, pilna sang Doctor thuam sawm a nei phial zong in Pasian' sathau nilhna a ngahlo makai sem nuam leh, minam vei khat i nung zuih tak ngeilo a, lamman hong tunpih zo ngeilo ding hi. Ahi zong in Zomi te khantoh nading lampi hong kipan ta a, Zolai kum 100 cin tawh kituak in Zomi te luang 17 val in a nuntakna uh tawh hong leisak na tungtawn pan hong suak GZA pen, Pasian' sathau nilhna hun leh mun pan hong piangkhia ahi hi. A makai dingte zong party khat makai ciang, kipawna khat makai ciang, khua khat, gam khat ciang hilo in leitungbup level ah Pasian' thupha piak, sathau nilh siampite vive hi lai ahih manin tang lai hun a Israel gam makaih Pasian sathau nilh siampite leh galhangte mahbang in Pasian' in hong teel sak in, hong sehsak hi. Pasian' sehna leh teelna telsiam teelcing pha makaite mipi in teel a, vaipuak zia dngte nial selo in Zomi leh Zogam a itnate uh hong lakkhia makaite in minam makaipi taktak ahih lam uh tangthute ek kak leng zong kimu thei hi.

Pasian' sathau nilhsa Leitungbup Zomi Makaite in Pasian leh Zomi leh Zogam a itna uh tawh a nuntakna uh kham in hong kipia uh ahih man un Zomi te a ding in tangthu maitak a gelh ihi khin zo hi.

Zogam pan kipan in Leitungbup a huam Zomi khempeuh makai ding in Pasian' in lampi hong honsak khinzo ahih man in, Zomi hi ingh akici mimal khat in Thungetna, Thapiakna, Khut kiletkhopna tawh ma pang inkalsuan khawm leng Zomi leh Zogam hong paallun petmah ding hi.

Taang Sianpu

sianpu@zomi.net

http://twitter.com/sianpu

Ih gelna te ih Pasian in hong thukumpih aa, a khatvei na GZA Makaite Khawmpi (December 14-18, 2011) nuamtak hong zawhpih a hih man in ih biak pa Pasian tungah lungdam thu ihko masa hi.

Laisiangtho sung ah “A hun a cin ciang in” cih kammal muntampi ah ih mu hi. Leitung khuahun te hong kihei toto in, Cope Centennial Jubilee Celebration (November 2010) khawmpi sung in Global Zomi Alliance (GZA) hong kipan khia hi. Tutung in makaite khawmpi a khat veina nuamtak ihnei thei khinta aa, hong pai makai khempeuh leh mipi te kilawp mahmah hi. “A nungta Pasian bulphuh in Zomite ki pumkhat aa a bucing khantohna neihding” ki lunggulh mahmah ta cih teltak in kimu theihi. Khawmpi sungah, tu aa kipan na sepkhiat ding ki thupi sak hi. Sep khiat pah ding leh, mailam aa sepding gelna tampi kinei aa, tua te Report #2 ah kong pulak ding hi.

GZA Khawmpi tawh kisai mipi tung aa zaksak na khen 2 khen 3 suah in kong taangko ding hi. Tutung aa pen Report #1 a hihi.

1). December 13, 2011 ni zintun ni hi aa, khawmpi hong kah makai te a vekpi phial mah in hunlap tak in hong kitung hi.

2). GZA Central Committee 6 te sungpan in Dr. Pau Khan En, Bishop Dr. Felix Lian Khen Thang, Dr. Do Suan Mung leh Dr. Chin Do Kham te hunlap tak in khawmpi bupsung kihel thei uh aa, nasepna leh innkuan vai tuamtuam te hangin Dr. Gin Khan Khual leh Dr. Ngul Khan Pau (JM Paupu) te hong kihel theilo uh hi.

3). Khawmpi kahding aa a kisam Standing Committee 15 sung aa member te leh a tuam aa a kisam Zomi sungpan ih muan ihsuan makai tuamtuam te a kigawm in 345 khawmpi ah hong kah thei uh aa, hongpai makai khempeuh in zong Zomite ki pumkhat aa a bucing khantoh nading lunggulh na leh veina takpi tawh hong kihel ciat uh a hih man in khawmpi hunsung khempeuh lawptak in thu kikupna ki nei ziahziah hi. India lam Zomi te sungpan Rev. Dr. Luai Chin Thang, Sia Dal Sian Pau (Ph.D. cand.) leh Rev. Go Khan Pau te hong kihel thei uh hi. Zomi leh Zogam veina tawh Singapore pan zong mi 6 hong kihel thei uh hi.

4). Local (Innteek) Hosting Committee kinei aa, a maute lawptak aa ma hongpan na hang un ih khawmpi a lawhcing ih hihi. Local Hosting Committee ah makai hongsep sak Rev. Go Za Nang leh committee member khempeuh tungah ih lungdam mahmah hi.

5). Lasa siam Stephen Vocal Band te, Fishers Quartet te, Bethel Bible College (AG) numei quartet te, Zomi Idol 2011 aa a khatna pan a thum nadong a ngah lasa siam te, Cing San, Lengtong Pauno, Lengtong Kam Khen, T.S. Khai, Cingpi, San Lun, ZOMUS group, Siamsin khangno te, lapawl tuamtuam te leh music tumsiam Farcon Band leh Ever Smile Band te ban ah lasiam leh lamsiam mimal leh group tuamtuam te in ih khawmpi hong etlawm leh nopci sak mahmah uh hi.

6). Khawmpi sung khempeuh ah Recording Secretary 3 (Rev. Cin Lian Sum, Siama Ciin Khan Cing leh Sia Gin Khan Suan) kiseh aa a mauteng in a kigen thute khempeuh limtak in laisung ah hong ciaptehsak uh hi.

7). Khawmpi sung khempeuh sunhun leh nitak hun a vekpi in Video kila aa, a phual mah ah video te kilei thei pah hi.

8). Pulpit lam a etlawm theithei dingin siama Ciang leh a lawmte ih nasia tak in hong zepsak uh aa, ih khawmpi hong thupi suahsak tuam mahmah hi.

9). Sunsung makaite meeting khempeuh Agape AG pawlpi ten innteek sem in biak inn hongzangsak uh aa, pawlpi mite in zin hongdo, an hong huansak, niangtui hong bawlsak in, khualpan zin pawl khat zong zin hong tungsak lai uh a hih man in, lungdam na lian mahmah hi.

10). Khawmpi sung nitak sim aa mipi tawh biakpiak na, lasakna leh thugen na khempeuh ZBCM huangsung ah kinei aa, a mun tangzai in a zat nuam mahmah hi. ZBCM tungah lungdam na lian hi.

11). ZYA te in Information leh transportation lam ah nasia tak in ma hongpang uh hi. Siamsin te in zinmuak na lam ah ma hongpang uh hi. Veng hausa te leh papi pawl khat te in Security hong sepsak uh aa, ah uniform uh tawh hong etlawm mahmah uh hi. Zosiam te in khawmpi sung khempeuh aa damlo te aa ding in zatui zaha leh mimal tawh sun leh zan in ma hongpang uh hi.

12). Chin Taungtan Hotel (Ko Ko Thang) ten Central Committee member teng FREE in zin hong tungsak uh hi. Sun leh zan in mei kingah, kisil nading tuisa kingah, room khempeuh ah wrireless internet kingah aa, zintun nuam kisa in ki lungdam mahmah hi.

13). Taung Zalat tuisiang bawlna company pan in, khawmpi sung tuisiang free in hongpia uh aa ki lungdam mahmah hi.

14). Nitak sim in mipi tawh lawptak in biakpiak kikhopna ki neiden aa, a tawpna nitak bang a tawmpen mipi tulsawm (10,000) sang tawmzaw loding hi ci in ki ciamteh hi.

15). Khawmpi nuamtak neih theih nading aa kumpi lampan phalna hong ngahsak sia Gin Khan Pau leh, kumpi lamtawh kisai vai khempeuh ah ma hongpang ZRDP makai pa Vum Za Nang tungah lungdam ihko hi.

16). Khawmpi sunhun sung ah Kalay district aa police a lianpen pa zong hongpai aa khamtheih guihtheih a kizuak loh a kizat loh nading in pastor te tawh na semkhawm ding hihang ci in hanthot na leh zotna thugen na hong nei hi.

17). Khawmpi Program te attachment file tawh hong khak ing. Download le cin ki en thei hi. Khawmpi photo (man) pawl khat zong hong khak ing.

Mipi zakding aa kilawm thute a banban in Report #2 leh #3 sungah kong pulak toto ding hi. Hih lai a simkha mimal khempeuh tungah ih Topa kiangpan hongpai thupha namkim hongtung tahen.

GZA Central Committee tangin,

Dr. Chin Do Kham
General Secretary

Reply to Discussion

RSS

© 2017   Created by Zomi Social Network.   Powered by

Badges  |  Report an Issue  |  Terms of Service