Lia Cingsan ci-a kithei Lia Man Suan Cing pen Rev. Tun Za Kap leh Nu Vung Khaw Niang sung pana suak unau pasal 1 leh numei 6 sung pan a nihna ahi hi. Khristian innkuan sung panin khangkhia-in 1978 kumin Zeisu gumpa leh honpa in a sang hi. A pa pen Evangelical Free Church of Burma (tu’n EFCM) ah Pastor hi a, a pa in tuiphum pah hi. A pa in Pasian thu leh la tawh pattahin, a nu in thu ngetsak zel hi.

Dorcas Team Piang


1981 kum ciangin a pa makaihna tawh “Dorcas Team” ci-in numei action team khat phuan uh hi. A pa gospel paina-ah zui zelin, a pa in thu genin Dorcas teamte in lasa zel hi.  Tua bangin Tedim gam, Manipur gam, Mizoram dongah gospel a pai uh hi. A nu in inn panin thungetna tawh a huh den hi.

1983 kum ciangin “Topa phat ni” cih lakhui khat a bawl uh hi. 1985 kumin “Zeisu’n ong kun” cih lakhui bawlin Lusei kam tawh “Lalpa fak ru” cih la khui 2 bawlin, 1989 kumin Lusei kam mah tawh “Babylon” cih la khui khat zong a bawl  hi.

Lai Siangtho Sangkah


1990 kum ciangin Pasian thu sin dingin India gam Gurgeon-ah a naute Liansen leh John Kampi tawh pai uh a, Topa hehpihna tawh kum khat a zo uh hi. Inn lam a ciah kawmun Nagaland-ah a lawmte tawh gospel a pai uh hi. 1991 kum ciangin Bangalore-ah Berean Baptist Bible College & Seminary-ah a naute 3 Liansen, John Kampi leh Kimnu tawh  a pai uh hi. Tua kumin Pasian thu leh la tawh a pattah a pian’na pa in nusia hi. Ama munah Pasian ding ahih manin a sang kahna uh a unau-un a zom suak thei uh hi. 1995 kum ciangin BBBC panin B.Th. degree a ngah hi.

EBC-ah Nasepna


1995 June kha panin Evangelical Baptist Conference Pawlpi in hun bit a la tawh Pasian nasem dingin la-in tu ni dongin a sem hi. 1997 kum ciangin a pa patsa zom kik uh a, a team memberte a kim nawn loh hangin amau unau teng mah in “Dorcas Unau” ci-in team bawlin “Phat ding kilawm” cih lakhui  a bawl uh hi. 2004 kum ciangin Rocky Mountain (USA) Zomi Innkuante panpihna tawh “Bethlehem Aksi” cih Christmas Album khat a bawl kik uh hi.  Hih lakhuite a pian theihna dingin mun tuamtuam a om Zomite thatang, neihsa leh thungetna tawh a panpihna hang bekin a piang thei hi ci-in lungdam mahmah hi. Midangte Album sungah zong a kihelna om kawikawi hi.

Pahtawina

1)      1998 kumin Tedim Christian Fellowship in Zogam a lasa siam cih pahtawina pia hi.
2)      2003 kumin Momnote in la sa siam pahtawina mah pia hi.
3)      2005 kumin ZCLS in lasa siam pahtawina pia hi.
Hih banga pahtawina a ngah theihna pen a pa pattahna leh a nu thungetsakna hang bek hi ci-in a ngaihsun hi. Hih sunga kigenkha lo pahtawina a ngah zong tampi tak om hi.

Amah Lia Cingsan in a la khui bawlte pen a pa phuahte leh midangte phuah tam zaw a, ama phuah taktak tam lo hi. BBBC a kah lai-in a pa in sihsan ahihmanin na sa mahmah a, a pa a itna la khat  phuak hi. Hih zong “Phat ding kilawm” cih khui sungah kikhum zo hi. A sak ciangin mite lungsim lawngin khitui luangsak thei hi. A dawngkimin en ni.

Ka zua lenna thangvan


1)      Siing vangkhua-ah ka hei a,
Zua saumang nuam tung ta ing;
Zua om lo koi na hei maw,
Kei ka hei kidang sang e maw.

Sawl bang na heina Sian anglai gam nuam hi,
Hai bang na ngak aw ka zua aw;
It teng tawh na siang kong leng ding.

2)      Aw ngilh mawng e ka zua aw,
Mu bang ngai nau bang kah law’ng;
Zuan sial ning e ka pham dong,
Hehnem siam gumpa hong nem aw.

3)      Len lai ni nuam hong phawng e,
Sian sinthu lel khop lai ni;
Von deih te’n ma na zom nung maw,
Sep zawh ciang zua pa’n hong dawn ding.

Admin’s Note: Lia Cingsan pen Lia hi nawnlo hi! 1997 kum in Dorcas Unau i album Phat Ding Kilawm pen Zolate lak ah Zomite a hoihlam a gen masa pen khat in ka ciamteh hi.  (Ka theihkhial leh comment ah hong hilh pah un!) Tua album sung a la khat ah “Zomi mipil, misiamte hong pia a..” cih dan in positive-impression hong pia khat ahihi. Tawldam mahmah sa ing. Tua ma in album-te ah Zomite hoihlohna vive kisa ngakngak pian hi.

(Hih pen Nov. 17, 2007 ni-a ama tangthu a gelhna pan hong kikaikhawm hi)

Rev. Gin Khan Nang

Views: 103

Reply to This

© 2017   Created by Zomi Social Network.   Powered by

Badges  |  Report an Issue  |  Terms of Service